މޮރޮއްކޯގައި ދަރުސެއްދެމުން އަޑުއަހަންތިބި މީހުންނަށް މަސައްކަތެއް ޖެއްސުވީމެވެ. އެއީ ދަރުސް މެދުކަނޑާލުމުން އެއްވެސް ބާވަތެއްގެ ކަންބޮޑުވުމެއް ކުރިމަތިވެފައި ނެތް ކިތައް މީހުންނާއި ބައްދަލުވޭތޯ ބަލަން 1 ގަޑިއިރު މގުތަކުގައި ހިނގާފައި އެނބުރި އައުމެވެ.
50 ވަރަކަށް ގްރޫޕް އެކިދިމާލަށް ދިއައެވެ. އެނބުރި އައިސް ބުނީ ކޮންމެވެސް ކަމަކާއި ކަންބޮޑުވާން ޖެހިފައިނުވާ ހަމަ އެކަކާއިވެސް ބައްދަލުނުވާކަމަށެވެ. އަދި ބައެއް މީހުން ބުނީ ކަންބޮޑުވާންޖެހޭ ކަންކަން އެބަހުރިކަމަށާއި ނަމަވެސް އެކަމަށް ނުވިސްނާތީ އެއީ މައްސަލައަކަށް ނުވާކަމަށެވެ.
އަހުރެން ބުނީމެވެ. އަހުރެން މިބުނަނީ ހަމަ ތިއަ ވާހަކައެވެ. މިދުނިޔޭގައި އުޅޭ ކޮންމެ މީހަކީވެސް ކޮންމެވެސް ކަމަކާއި ކަންބޮޑުވާންޖެހިފައިވާ މީހެއް ކަމަށާއި އެނޫން ހަމައެކަކުވެސް ނުހުންނާނެ ކަމަށެވެ.
ދެން ތަކުރާރުކުރީ މިވާހަކަކޮޅެވެ.
ތަނަވަސްކަން ލިބިއްޖެނަމަ އެތަނަވަސްކަން ގެއްލިދާނެތީ ކަންބޮޑުވެއެވެ. ތަނަވަސްކަން ގެއްލިއްޖެނަމަ ތަނަވަސްކަން ގެއްލުނީތީ ކަންބޮޑުވެއެވެ. ތިމާއަށް ދެއްވަވާ ކޮންމެ ނިޢުމަތަކާއި މެދުގައިވެސް ކަންބޮޑުވުންތައް ހަމަ މިފަދަ ގޮތަކަށް ހުރެއެވެ. ފުރަތަމަ ކަން ބޮޑުވަނީ ނިޢުމަތް ނުލިބިގެންނެވެ. ލިބުމުން ކަންބޮޑުވަނީ ގެއްލިދާނެތީއެވެ.
އެއްބައަކު ކައިވެނި ނުކުރެވޭހާއިރު ކައިވެނި ނުކުރެވޭތީ ކަންބޮޑުވެއެވެ. ކައިވެނިކުރެވުނީމާ ކައިވެނި ރޫޅިދާނެތީ ކަންބޮޑުވެއެވެ. އަނެއް ބައަކު ކައިވެނި ކުރެވުމުން އުޅެންޖެހޭ ހިތްދަތި ދިރިއުޅުމުގެ ސަބަބުން ކައިވެނިކުރެވުނީތީ ކަންބޮޑުވެއެވެ. ކައިވެނި ރޫޅޭއިރަށް ކައިވެނިރޫޅި އެކަނިވެރިވީތީ ކަންބޮޑުވެއެވެ.
މިހެންގޮސް ކިޔާނެ ކަމެއް ނެތެވެ. ދުނިޔޭގައި ހޭދަކުރަންޖެހޭ ކޮންމެ ދުވހަކީވެސް ހާސްވުމާއި ކަންބޮޑުވުމުގައި ހޭދަކުރަންޖެހޭ ދުވަހެކެވެ. އެއީ އެކަން ﷲ ތަޢާލާ މިންވަރުކުރައްވަވާފައިވާ ގޮތެވެ. ހާސްވުމާއި ކަންބޮޑުވުންތައް ފިލައިގެންދާނީ ހަމައެކަނި ސުވަރުގެ ވަދެވުމުންނެވެ. ސުވަރުގެ ވަދެވުމާއިއެކު ކޮންމެ މީހަކުވެސް ”އަލްޙަމްދުލިﷲ“ ކިޔާނެއެވެ. އެއީ ހުރިހާ ހާސްވުމާއި ކަންބޮޑުވުންތައް ފިލައި އެކަމުން ސަލާމަތްވެވުނީތީއެވެ. ކަންބޮޑުވާންޖެހޭ އެއްވެސް ކަމެއް ދެން ކުރިމަތިނުވާނެތީއެވެ.
ހާސްކަމާއި ކަންބޮޑުވުމަށް އޮތް އެންމެ މޮޅު ފަރުވާއަކީ އެއީ މައްސަލައެއް ނޫންކަމާއި ދުނިޔޭގައި ހުރިހާ ދުވަހަކު އެކަންކަން ކުރިމަތިވާނެކަން ޤަބޫލުކުރުމެވެ. އެކިމީހުންނަށް އެކިވަރަށެވެ. އެކިގޮތްގޮތަށެވެ. އެކި ކަންކަމުގައެވެ.
ދާއިމީ ފަރުވާއެއް ލިބެން މިއޮތީ ކުރިން މިބަޔާންކުރި ފަދައިން ހަމައެންމެ ގޮތަކުންނެވެ. އެއީ ސުވަރުގެ ވަދެވުމެވެ. ވީމާ އަހަރެމެންނަށް އޮތީ ސުވަރުގެ ވަންނަން ގަދައަޅައި މަސައްކަތްކުރުމެވެ. ގިނަގިނައިން ތައުބާވެ ހެޔޮ ޢަމަލުތައް ކުރުމެވެ.
