ދަރުމަވަންތަ ހޮސްޕިޓަލް ފުލީ ފަންގްޝަނަލްކޮށް ބޭނުން ނުކޮށް ދޫކޮށްލާފައި އޮތުމަކީ ކުރީ ސަރުކާރުން ރައްޔިތުންނަށްވީ ވަރަށް ބޮޑު އިހުމާލެއް ކަމަށް ހެލްތު މިނިސްޓަރ އަބްދުﷲ ނާޒިމް ވިދާޅުވެއްޖެ އެވެ.
2019 ވަނަ އަހަރު އޮޕަރޭޝަނަށް ގެނެސް ބޭނުންކުރަން ފެށި ދަރުމަވަންތަ ހޮސްޕިޓަލް, ޓާޝިއަރީ ފެންވަރުގައި ރަސްމީކޮށް މިރޭ ވަނީ ހުޅުވާފަ އެވެ. ދަރުމަވަންތަ ހޮސްޕިޓަލް 2018 ވަނަ އަހަރު ނިންމާ ބޭނުން ކުރަން ފެށި ނަމަވެސް މީގެ ކުރިން މިހޮސްޕިޓަލްގެ ހުރިހާ ފުލޯ އެއް ބޭނުމެއް ނުކުރެ އެވެ. ބޭނުން ކުރަމުން އައީ މަދު ފްލޯ ތަކަކާއި މަދު މެޝިނަރީޒް އެކެވެ.
ދަރުމަވަންތަ ހޮސްޕިޓަލަކީ ދައުލަތުގެ ބަޖެޓުން ގާތްގަޑަކަށް 200 މިލިއަން ޑޮލަރު ނުވަތަ 3 ބިލިއަނެއްހާ ރުފިޔާ ޚަރަދުކޮށްގެން ޢިމާރަތްކުރި ހޮސްޕިޓަލެކެވެ. އެހެން ނަމަވެސް މިއަދާ ހަމައަށް އައިއިރު ވެސް، އެ ހޮސްޕިޓަލު ރަސްމީކޮށް ނުހުޅުވައި، ބައެއް ފަންގިފިލާތަކުގައި ހުރީ ތަޅުއެޅުވި، ބައެއް ޚިދުމަތްތައް ނުފެށިފައެވެ.
ދަރުމަވަންތަ ހޮސްޕިޓަލް ރަސްމީކޮށް ހުޅުވުމާށް ބޭއްވި ރަސްމިއްޔާތުގައި ހެލްތު މިނިސްޓަރ އަބްދުﷲ ނާޒިމް ވިދާޅުވީ 2018 ވަނައަހަރު ނިމިފައިހުރި ދަރުމަވަންތަ ހޮސްޕިޓަލް ފުލީ ފަންގްޝަނަލްކޮށް ހިދުމަތް ނުދީ ބޭނުންނުކޮށް ހުރީ ކީއްވެތޯ ރައްޔިތުން ސުވާލުކުރާތާ ހައެއްކަ އަހަރުވެއްޖެ ކަމަށެވެ. ރައްޔިތުން އެކުރާ ސުވާލުގެ އަޑު މިއަދުގެ ރައީސް ވަރަށް ކަނުލާ އައްސަވައިފިކަން މިރޭ މިހަފްލާއަށް ވަޑައިގަތުމުން ރަމްޒުކޮށްދޭ ކަމަށް ނާޒިމް ވިދާޅުވި އެވެ.
ނާޒިމް ވިދާޅުވީ ދަރުމަވަންތަ ހޮސްޕިޓަލް އޭގެ އެންމެ ފުރިހަމަ ގޮތުގައި ބޭނުންކުރި ނަމަ ރާއްޖޭގެ ސިއްހީ ނިޒާމަށް ކޮންމެވެސް ވަރެއްގެ ކުރިއެރުންތަކެއް އަންނާނެ ކަމަށެވެ. އެހެން ނަމަވެސް މިހާ ގިނަދުވަސް ވަންދެން މިތަން ބޭނުން ނުކޮށް ދޫކޮށްލާފައި އޮތް އޮތުމަކީ ރައްޔިތުންނަށްވީ ވަރަށްބޮޑު އިހުމާލެއް ކަމަށް ނާޒިމް ވިދޅާުވި އެވެ.
“ މާލިއްޔާއިން ގާތްގަނޑަކަށް 200 އެތައް ،މިލިއަންޑޮލަރެއް ހަރަދުކޮށްގެއް އަޅާފައިވާ މިއިމާރާތް އިހުމާލުވެ ދޫކޮށްލެވިފައި އޮތް އޮތުން އެއީ ރައްޔިތުންނަށް ވެފައި އޮތް ބޮޑު އިހުމާލެއްކަން ރައްޔިތުން ދެކޭ، މިދެންނެވި މައްސަލަތައް އެޓެންޑްވެ އޮތް އޮތުން ބުނެދެނީ ސިއްހީ ނިޒާމުގަ ހުރި ވަރަށްބޮޑެތި ބާގަނޑުތަކެއް ހުރިކަން އަދި އެބާގަނޑުތައް ފޫބެއްދުމަށް މަސައްކަތް ކުރަން ޖެހޭ“ ނާޒިމް ވިދާޅުިވި އެވެ.
ނާޒިމް އިތުރަށް ވިދާޅުވީ ދިވެހިރާއްޖޭގެ ސިއްހީ ނިޒާމްގައި ހުރި އެތައް މައްސަލަތަލެއް ހައްލުކުރެއްވުމަށް ރައީސުލްޖުމްހޫރިއްޔާ ކުރައްވަމުން ގެންދަވާ މަސައްކަތްޕުޅު މިއަދު ފެނިގެންދާކަމަށެވެ. އޭގެ ތެރޭގައި ބަލިވީމަ ބޭސްފަރުވާގެ ނިޒާމް ހަރުދަނާކުރުމާއި، އެކަންކަން ފުޅާކުރުމާއި، މިކަމުގެ އިތުރުން ބަލިމަޑުކަމުން ދުރުހެލިވެ ތިބުމަށްޓަކައި ދުޅާހެޔޮ އާބާދީއެއް މި ގައުމުގައި ބިނާކުރުމާއި އަދި ސިއްހީ ދާއިރާގެ ގަވަނަންސް ހަރުދަނާކުރުމަށްޓަކައި ކުރައްވަންޖެހޭ އެތައް މަސައްކަތްތަކެއް މި 52 ހަފްތާގެ ތެރޭގައި ރައީސްގެ ސީދާ ބެލުމުގެ ދަށުން ފެށިފައިވާ ކަމަށް ނާޒިމް ވިދާޅުވި އެވެ.
ކުރިއަށް އޮތްތަނުގައި ރާއްޖޭގެ ސިއްހީ ނިޒާމު ދާނީ މިއަށް ވުރެ ތަރައްގީ ވަމުން ކަމަށާ ، މި ވޭތުވެދިޔަ 1 އަހަރު ފަށަފައި ހުރި މުހިންމު މަސައްކަތްތަކާއިއެކު ކުރިއަށްއޮތް 4 އަހަރު ވާނީ ދިވެހި ރައްޔިތުންނަށް ސިއްހީ ނިޒާމުގެ މުޅިން އައު ބާބެއް ލިޔެވިގެންދާނެ 4 އަހަރު ކަމަށް ނާޒިމް ވިދާޅުވި އެވެ.
