ރައްޔިތުންގެ މަޖިލީހަށް މި އިސްލާހުތައް ހުށަހެޅީ، ސަރުކާރުގެ ފަރާތުން ހުޅުދޫ ދާއިރާގެ މެންބަރު މުހައްމަދު ޝާހިދުއެވެ.
ގާނޫނު އަސާސީއަށް ސަރުކާރުން ހުށައެޅި އިސްލާހުތައް
- މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭ ގޮތް ހެދުން
- ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުން
- ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ހެދުން
މި ބިލްގެ ފުރަތަމަ ކިޔުން ހެނދުނު އިއްވުމަށްފަހު ޕީއެންސީގެ ސުޕާ މެޖޯރިޓީން ވަނީ ބިލު މަޖިލިހަށް ބަލައިގަނެފައެވެ. އަދި މުޅި މަޖލީހުގެ ކޮމެޓީއަށް މައްސަލަ ފޮނުވާ ދެ ގަޑިއިރުގެ ތެރޭގައި ބިލް ދިރާސާކޮށް ކޮމެޓިން މިވަނީ ފާސްކޮށްފައެވެ.
ވޯޓިން ސިސްޓަމް މައްސަލަޖެހިފައިވާކަމަށް ބުނެ ބިލަށް ހުށައެޅި އިސްލާހުތަކަށް ވޯޓަށް އަހާފައިވަނީ ވަކިވަކި މެމްބަރުންގެ ނަން ގޮވައި އަނގަބަހުން އަހައިގެންނެވެ. ކޮމެޓީން ބިލު ފާސްކުރީ 75 މެމްބަރުންގެ ވޯޓާއި އެކުއެވެ. ނުފެންނަކަމަށް ވޯޓް ދިނީ 13 މެމްބަރުންނެވެ.
މި ބިލް މަޖިލީހުން ފާސްކުރުމަށް މިއަދު ހަވީރު 05:30 ގައި ޖަލްސާއެއް ބާއްވަން ވަނީ އެޖެންޑާކޮށްފައެވެ.
