މިދިޔަ ބުރާސްފަތި ދުވަހު ހައުސިން މިނިސްޓްރީ ހިމެނޭހެން ތިން މިނިސްޓްރީއެއްގައި ހިނގި އަލިފާނުގެ ހާދިސާއާއި ގުޅިގެން އެތަންތަން ސާފު ކުރުމުގެ މަސައްކަތް ފަށައިފި އެވެ.
އަލިފާން ރޯވި އިމާރާތް ސާފުކުރުމުގެ މަސައްކަތްކުރަނީ މިނިސްޓްރީ އޮފް ސިޓީސް ލޯކަލް ގަވަމެންޓު އެންޑް ޕަބްލިކް ވޯކްސްއިން އެވެ.
އަލިފާން ރޯވީ ހައުސިން މިނިސްޓްރީއާއި ކޮންސްޓްރަކްޝަން މިނިސްޓްރީއާއި އެންވަޔަރަމެންޓު މިނިސްޓްރީގެ އިތުރުން މާލޭ ސިޓީ ކައުންސިލުގެ ތިން ސެކްޝަނެއް ހިންގަމުން އައި އިމާރާތުގަ އެވެ.
ބުރާސްފަތި ދުވަހުގެ ހެނދުނު 7 ޖެހިއިރު ރޯވި އަލިފާންގަނޑު، އެމްއެންޑީއެފް އަދި ގުޅުން ހުރު އިދާރާތަކުގެ މަސައްކަތުން ނިންމާލެވުނީ އެދުވަހުގެ މެންދުރު 12ގެ ފަހުންނެވެ.އެންމެ ބޮޑަށް ރޯވެ އަނދާފައި ވަނީ ހައުސިން މިނިސްތްރީ ހިންގަމުން އައި އިމާރާތުގަ އެވެ. އެ އިމާރާތް ހަދާފައި ވަނީ ޓީނުންނާއި ލަކުޑިންނެވެ.
މިނިސްޓްރީ އޮފް ސިޓީސް ލޯކަލް ގަވަމެންޓު އެންޑް ޕަބްލިކް ވޯކްސްއިން ބުނީ އަލިފާނުގެ ހާދިސާ ހިނގި ސަރަހައްދުގައި ހުރި ކުނިތައް ނަގައި، ބިން ސާފުކުރުމުގެ މަސައްކަތް މިހާރު ފަށަފައިވާ ކަމަށެވެ. މިހާދިސާއާއި ގުޅިގެން އަމީނީމަގުގެ ބައެއް ވަނީ ބަނދުކޮށްފަ އެވެ.
މިނިސްޓްރީން ބުނީ އެ އިމާރާތް ސާފުކުރުމަށް ފަހު މިހާރު ބަންދުކުރެވިފައިވާ އަމީނީ މަގު މާދަމާ ހުޅުވާލެވޭވަރު ވާނެކަމަށް ފަލާކުރެވޭ ކަމަށެވެ.
އެއްވެސް މީހަކަށް މި އަލިިފާނުގެ ހާދިސާގައި އަނިޔާއެއް ނުލިބެ އެވެ.
ހާދިސާ ހިނގަން މެދުވެރިވި ސަބަބު ފުލުހުން އަންނަނީ ބޭރުގެ އެހީ އައި އެކު ތަހުގީގު ކުރަމުންނެވެ.
މި އަލިފާނުގެ ހާދިސާގައި ތިން މިނިސްޓްރީއެއް ހިންގި އިމާރާތަށް ގެއްލުންވެފައިވާއިރު، އެ މިނިސްޓްރީތަކުގެ ޚިދުމަތްތައް ވަގުތީ ގޮތުން ވަނީ މެދުކެނޑިފައެވެ. އެހެންކަމުން، އަލުން ޚިދުމަތްތައް ފެށުމަށްޓަކައި ދަރުބާރުގޭގައި ވަގުތީ އޮފީސްތައް ގާއިމުކޮށް، ޚިދުމަތްތައް ފެށުމުގެ މަސައްކަތް ދަނީ ކުރަމުންނެވެ.
