ރައްޔިތުންނާއެކު ގުޅުން ބަދަހިކުރުމަށް ”ފުލުހަކާއެކު ކޮފީއެއް“ ގެ ނަމުގައި ބޭއްްވުމަށް ހަމަޖެހިފައިވާ ހަރަކާތް މޫސުން ގޯސްވުމުގެ ސަބަބުން ފަސްކޮށްފިއެވެ.
ފުލުހުން ”އެކްސް“ ގައި ކުރި ޕޯސްޓެއްގައި ވަނީ މިއަދު ބޭއްވުމަށް ހަމަޖެހިފައިވާ ”ފުލުހަކާއެކު ކޮފީއެއް“ ހަރަކާތް މޫސުން ގޯސްވުމުގެ ސަބަބުން ފަހުގެ ތާރީހަކަށް ފަސް ކުރެވިފައިވާ ކަމަށެވެ.
ފުލުހުންގެ ހިދުމަތުން ކުރިއަށްގެންދާ މިޕްރޮގްރާމަކީ ސިލްސިލާކޮށް ކުރިއަށްގެންދިޔުމަށް ނިންމާފައިވާ ޕްރޮގްރާމެކެވެ.
މިދިޔަ އަހަރުގެ ޑިސެމްބަރުގައި ވެސް ވަނީ ފުލުހަކާއެކު ކޮފީއެއްގެ ހަރަކާތް ކުރިއަށް ގެންގޮސްފައެވެ. އެ ބައްދަލުވުމުގައި ގިނަ ބައެއްގެ ބައިވެރިވުން ލިބި، ހުޅުވިގެންވާ މާހައުލެއްގައި ފުލުހުންނާއެކު މުހިންމު މަޝްވަރާތަކެއް ކުރެވުނު ކަމަށް ފުލުހުން ވިދާޅުވިއެވެ.
ފުލުހުން ވިދާޅުވީ އެފަދަ ހަރަކާތްތަކަކީ ރައްޔިތުންގެ އިތުބާރު ހޯދައި، ގުޅުން ބަދަހިކުރުމަށް އެޅޭ މުހިންމު ފިޔަވަޅުތަކެއް ކަމަށެވެ.
