ޖަނގިޔަލުގެ ތެރޭގައި ހަރުފަތަކެއް ފޮރުވައިގެން ތައިލެންޑަށް އެތެރެކުރަން އުޅުނު ސްރީލަންކާ މީހަކު ހިފަހައްޓައިފިއެވެ.
މިދިޔަ އަންގާރަ ދުވަހު ހައްޔަރުކޮށްފައި ވަނީ އޭނާގެ އަމަލުތަކަށް ޝައްކުވެ، އެއާޕޯޓް ކަސްޓަމްސް އޮފިޝަލުން އޭނާ ބަލައި ފާސްކުރުމުންނެވެ. އޭނާއަކީ ތައި އެއާވޭސްގެ ފްލައިޓަކުން ބެންކޮކަށް އައި މީހެކެވެ. އެމީހާ ހިފެހެއްޓީ ސުވަރްނަބުމީ އެއާޕޯޓުންނެވެ.
ހައްޔަރުކުރި މީހާއަކީ ޝީހާން ނަމަކަށް ކިޔާ 30 އަހަރުގެ ލަންކާ ރައްޔިތެއް ކަމަށް ރިޕޯޓުތައް ބުނެއެވެ.
އޭނާގެ ޖަނގިޔަލުގެ ތެރޭގައި ޕެކެޓަށް އަޅައި ފޮރުވާފައި ހުރި ޖުމްލަ ފަސް ހަރުފަ ބެންކޮކް ކަސްޓަމްސް އޮފިޝަލުން ވަނީ ހޯދައިފައެވެ. އޭގެ ތެރޭގައި ހިމެނެނީ ހަތަރު ބޯލް ޕައިތަންއާއި އެއް ބޯ ކޮންސްޓްރިކްޓަރެވެ. މި ހަރުފަތައް މިހާރު ވަނީ ތައިލެންޑުގެ ވައިލްޑްލައިފް ކްރައިމް އިންޓެލިޖެންސް ސެންޓަރާ ހަވާލުކޮށްފައެވެ.
ބެންކޮކް ޕޯސްޓުގައި ބުނެފައިވާ ގޮތުގައި، މި މީހާ މީގެ ކުރީންވެސް ގަވައިދާ ހިލާފަށް ޖަނަވާރު ބޭރުކުރަން އުޅުމުގެ ކުށުގައި ހައްޔަރުކުރިއެވެ. އެހެންކަމުން، މިއީ އޭނާގެ ފަރާތުން ފެނުނު ފުރަތަމަ ފަހަރެއް ނޫން ކަމަށްވެސް ރިޕޯޓުތައް ބުނެއެވެ.
އެމީހާއަކީ ވައިލްޑް ލައިފްގެ އެކި ބާވަތްތައް ކަމަށްވާ ހިޔަޅު، މީރުކަޓްސް، ކަޅު ކޮކަޓޫސް، ޝުގާ ގްލައިޑާސް، ޕޯކިއުޕިންސް، ބޯލް ޕައިތަން، އިގުއާނާ، ބޮއް، ސަލަމަންޑާ އަދި ކަހަނބު ފަދަ ތަކެތި ޓްރެފިކް ކުރުމުގެ ތާރީހެއް އޮތް މީހެކެވެ.
މި ހާދިސާ ހިނގާފައި މިވަނީ، ގަވައިދާ ހިލާފަށް ޖަނަވާރު ވިޔަފާރިކުރުމުގެ މައްސަލަތައް ދުނިޔޭގެ އެކި ކަންކޮޅުތަކުގައި އިތުރުވެފައިވާ ދަނޑިވަޅެއްގައެވެ. މިފަދަ އަމަލުތަކަކީ ތިމާވެއްޓަށާއި ޖަނަވާރުގެ ދިރިއުޅުމަށް ބޮޑެތި ގެއްލުންތަކެއް ލިބޭނެ ކަންކަމެވެ.
