ދިރާގުން އައިފޯން 17 ސީރީޒްގެ ޕްރީއޯޑަރ ހުޅުވާލުމަށްފަހު މަދު ވަގުތުކޮޅެއްގެ ތެރޭގައި އައިފޯން 17 ޕްރޯގެ ފުރަތަމަ ސްޓޮކް ވަނީ ހުސްވެފައެވެ. ދިރާގުން މި ސީރީޒްގެ ފޯނުތައް ޕްރީއޯޑަރަށް ވިއްކަން ފެށީ ރޭ ދަންވަރު 12:01 ގައި ކައުންޓްޑައުންއެއް ހިންގުމަށްފަހުއެވެ.
ދިރާގުން މިއަދު ހާމަކުރި ގޮތުގައި މިއަދުގެ ހެނދުނު 10:30 އާ ހަމައަށް އައިފޯން 17 ޕްރޯގެ ފުރަތަމަ ސްޓޮކް ވަނީ ހުސްވެފައެވެ. ނަމަވެސް، އައިފޯން 17 ޕްރޯ މެކްސް އަދި އައިފޯން 17 އަދިވެސް ވަރަށް މަދު އަދަދަކަށް ލިބެން ހުރި ކަމަށް ދިރާގުން ވަނީ ހާމަކޮށްފައެވެ.
އެޕަލްގެ އައިފޯން 17 ޕްރޯއަކީ މިހާތަނަށް އެންމެ ބޮޑު ބެޓެރީއާއެކު ތައްޔާރުކޮށްފައިވާ އަދި އެންމެ ބާރުގަދަ އައިފޯނެވެ.
މި ފޯނުގައި ހަރުކޮށްފައިވާ ތިން ކެމެރާއަކީވެސް 48 މެގަޕިކްސެލްގެ ކެމެރާތަކެކެވެ. މިއީ މިހާތަނަށް އޮޕްޓިކަލް ޒޫމް އެންމެ ވަރުގަދަ ފޯނު ކެމެރާ ކަމަށް ވެފައި، ކުރީގެ މޮޑެލްތަކަށް ވުރެ އެތައް ގުނައެއް ވަރުގަދަ ކަމަށް ވެސް ވަނީ ފާހަގަކުރެވިފައެވެ. މި ފޯނުގެ ވީޑިއޯ ފެންވަރު ވެސް ވަނީ އިތުރަށް ވަރުގަދަކޮށްފައެވެ. މިކަމުގެ ހެއްކެއްގެ ގޮތުން، އެޕަލްގެ އާ އުފެއްދުންތައް ތައާރަފުކުރުމަށް މި މަހުގެ ނުވަވަނަ ދުވަހު ބޭއްވި އިވެންޓުގެ ވީޑިއޯ ވެސް ރެކޯޑުކޮށްފައިވަނީ އައިފޯން 17 ޕްރޯއިންނެވެ.
ދިރާގުން ބުނެފައިވާ ގޮތުގައި އިތުރު ސްޓޮކެއް ވަރަށް އަވަހަށް ގެންނާނެއެވެ. އަދި މިހާރު ލިބެން ހުރި އައިފޯން 17 ޕްރޯ މެކްސްއަކީ އައިފޯން 17 ޕްރޯއަށް ވުރެ ސައިޒުގެ ގޮތުން ބޮޑު ފޯނެކެވެ.
