ގާނޫނަށް، ގޮންޖަހައި އެ މުގުރާލުމަށް ފަހު ގާނޫނާއި ހިލާފަށް ކަންކުރަން، މި ގައުމުގައި އެއްވެސް ބަޔަކަށް ފުރުސަތެއް ނޯންނާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް އެ އިޝާރާތް ކުރެއްވީ، މޯލްޑިވްސް ބްރޯޑްކާސްޓް އެންޑް މީޑިއާ ރެގިއުލޭޝަން ބިލު ފާސްކޮށް ތަސްދީގު ކުރުމުން އެއަށް އަމަލު ނުކުރާނެކަމަށް ބައެއް ނޫސްވެރިން ބުނަމުން ދާތީ އެކަމަށެވެ. ގާނޫނާއި ދެކޮޅު ހަދައި، ބައެއް ނޫސްވެރިން ބުނެފައި ވަނީ މިއީ މިނިވަންކަމަށް ހުރަސްއަޅައި، ތެދު މައުލޫމާތު ގެނެސްދިނުން ހުއްޓުވުމަށް ފަރުމާކޮށްފައިވާ ބިލެއް ކަމަށެވެ. ނަމަވެސް އެ ވާހަކަތައް ސަރުކާރުން ދޮގު ކުރެ އެވެ.
މިރޭ ރައީސް މި މައުޟޫއުގައި ވާހަކަ ދައްކަވާފައި ވަނީ، މި ވަގުތު އަތޮޅުތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ވ. ފެލިދޫގެ ރައްޔިތުންނާއި ބައްދަލު ކުރައްވައި ވާހަކަ ދައްކަވަމުންނެވެ.
ރަށުގެ ރައްޔިތުންނާއި ބައްދަލު ކުރައްވައި ދެއްކެވި ވާހަކަފުޅުގައި ރައީސް ވަނީ ސަރުކާރުގެ ސިޔާސަތުތަކާއި ގުޅުވައި އަމާޒު ކުރާ އެކި ފާޑުކިއުންތަކަށް ރައްދު ދެއްވާފަ އެވެ. އަދި ވިދާޅުވީ އިގްތިސާދީ އެތައް ގޮންޖެހުމަކާއި އެކު ވެސް އެމަނިކުފާނު ރައްޔިތުންނަށް ހިދުމަތް ދިނުމަށް މަސައްކަތް ކުރައްވަމުން ގެންދަވަނީ ފައިސާ ޗާޕު ނުކޮށް އިތުރު ދަރަނި ނެގުމަކާއި ނުލައި ކަމަށެވެ.
ރާއްޖޭގެ ޝަރުއީ ނިޒާމަށް ނުފޫޒު ފޯރުވާކަމަށް ނުވަތަ ކޯޓުން ބޭނުން ގޮތަކަށް ހުކުމްތައް ނެރޭކަމަށް ބުނެ އަމާޒު ކުރާ ވާހަކަތަކަށް ރައީސް މުއިއްޒު ވިދާޅުވީ އެއްވެސް ޝަރީއަތެއް ވަކި ގޮތަކަށް ނިންމަން ބުނެ އަންގަވާފައި ނުވާނެކަމަށެވެ. އަދި މައްސަލައެއް ބޭރު ކުރުމަށް، ނުވަތަ ކުށް ސާބިތު ކުރުމަށް ނުވަތަ ލަސްކޮށް ހިފެހެއްޓުމަށް ވެސް ދުވަހަކު ވެސް ބުނެފައި ނުވާނެކަމަށް ރައީސް ވިދާޅުވި އެވެ.
ރައީސް މުއިއްޒު ވިދާޅުވި ގޮތުގައި ގާނޫނާއި ގަވައިދުތައް އޮންނަނީ ވަކި ބޭނުމެއްގަ އެވެ. އަދި އަސްލެއް، ހަގީގަތެއް ނެތް ވާހަކަތައް ގަސްދުގައި ލިޔަމުން ގެންދިއުމަކީ އެންމެ ރަނގަޅު ގޮތް ނޫންކަމުގައި ވިދާޅުވި އެވެ.
ރައީސް މުއިއްޒު ވިދާޅުވީ އެއްވެސް މީހަކަށް މި އުސޫލާއި، ގާނޫނުތަކަށް ގޮންޖަހާލުމަށް ފަހު ގާނޫނަކަށް ތަބައެއް ނުވާނަމޭ ބުނެ ކަމެއް ކުރުމުގެ ފުރުސަތެއް ނުދެއްވާނެ ކަމަށެވެ. ގައުމު ހިންގެވުމާއި ހަވާލުވެޑައިގަތީ ގާނޫނު ނެގެހެއްޓެވުމަށްކަން ފާހަގަކުރައްވައި، ގާނޫނުގެ ވެރިކަމުގެ ކުރިމަތީގައި ހުރިހާ ރައްޔިތުން ހަމަހަމަވާނެކަމަށް ރައީސް ވިދާޅުވި އެވެ.
ދިވެހިންނަކީ ސައްތައިން ސައްތަ އިސްލާމީ ރައްޔިތުންތަކެއް ތިބި ގައުމެއްކަމަށްވުމާއި އެކު، ގަބޫލު ކުރާ ހަމަތަކާއި އުސޫލުތައް ހިފަހައްޓަން ޖެހޭކަން ރައީސް ފާހަގަކުރެއްވި އެވެ. އެއީ ކޮންމެ ރައްޔިތަކީ ބެސް އަބުރަކާއި އިއްޒަތެއް އޮތް މީހެއްކަމަށްވުމާއި އެކު އިހުތިރާމާއި ގަދަރު ދޭން ޖެހޭތީކަމަށް ރައީސް ވިދާޅުވި އެވެ.
ރައީސް މުއިއްޒު ފާހަގަކުރެއްވި ގޮތުގައި، ދިވެހިރާއްޖެއަކީ އިސްލާމީ ގައުމެއްކަމުން، މުޖްތަމައު ގަބޫލުކުރާ ހަމަތަކެއް ދެމެހެއްޓުން މުހިންމެވެ. އަދި އެ ހަމަތައް ހިފަހައްޓައިގެން ނޫނީ ހަމަޖެހުން ގާއިމު ނުކުރެވޭނެކަމުގައި ވިދާޅުވި އެވެ.
ރައީސް ވިދާޅުވީ ކޮންމެ މީހަކީ އަބުރަކާއި އިއްޒަތެއް ލިބިގެންވާ މީހެއްކަން އެންމެން ގަބޫލު ކުރަންޖެހޭ ކަމަށާއި، ދިވެހި ގައުމުގައި ހަމަޖެހުން ގާއިމުވެގެން ދާނީ ކޮންމެ މީހަކު އަނެކާއަށް އިޙްތިރާމް އަދާކުރަން ދަސްކުރި ދުވަހަކުން ކަމަށެވެ.
ގޮންޖަހާލާފައި ގާނޫނަކާއި ހިލާފަށް މިތާކު، ގާނޫނަކަށް ތަބައެއް ނުވާނަމޭ ބުނެފައި އެއްވެސް ކަމެއް ކުރުމުގެ ފުރުސަތު ނުދޭނަން… އެއީ އަޅުގަނޑަށް އޮތް ފުރުސަތެއް ނޫން، އަޅުގަނޑަށް ކޮށްގެން ހުރި ހުވާގައި ހުރި ފުރުސަތެއް ނޫން އެއީކީއެއް
މީގެއިތުރުން ރައީސް މުއިއްޒު ވިދާޅުވީ، ސިޔާސީ ފަރާތްތަކާއި، މީޑިއާ އަދި ރައްޔިތުންނަށްވެސް ތެދުބަހުން ވާހަކަދައްކައި، ކަންކަމުގެ ހަގީގަތް ހާމަކުރުމުގެ މިނިވަންކަން އެބައޮތް ކަމަށެވެ.
މީޑިއާ ރެގިއުލޭޝަން ގާނޫނުގައި ވަނީ ސާބިތުނުކުރެވޭ ވާހަކަ ނުދެއްކުމަށާއި، ދޮގު ވާހަކަަތައް ނުފެތުރުންކަމަށް ފާހަގަކުރައްވައި ރައީސް ވިދާޅުވީ ގާނޫނުން ނޫސްވެރިކަން ބަނދެވިފައި ނުވާކަމަށެވެ.
ރައީސް ވިދާޅުވީ ތެދު ބެލުމެއްނެތި ހަގީގަތާއި ހިލާފު ވާހަކަ ދެއްކުމުން ގެއްލިގެން ދަނީ މުޅި ގައުމުގެ ހަމަޖެހުން ކަމަށެވެ. ރައްޔިތުންނަށް ހަގީގަތް ހާމަކުރުމުގައި ފުރިހަމަ މިނިވަންކަން އޮތް ނަމަވެސް، ފިތުނަ ފަސާދަ އުފެދޭ ގޮތަށް ދޮގު ފެތުރުމަށް އެއްވެސް ޖާގައެއް ނުދެއްވާނެ ކަމަށް ތަކުރާރުކޮށް ރައީސް ވިދާޅުވިއެވެ.
