އެމްޑީޕީގެ ރިޔާސީ ޕްރައިމަރީގައި ވާދަނުކުރަން ނިންމައި އޭރުގެ ރައީސް އިބްރާހިމް މުހައްމަދު ސޯލިހަށް ދެ ފުރުސަތު ދެއްވާފައިވާނެ ކަމަށާއި ނަމަވެސް ސޯލިހު ހިމެނޭހެން އެ މަނިކުފާނުގެ އަރިސް ބޭފުޅުންނަށް އެގޮތް ކަމުނުދިޔައީ ކަމަށް އެމްޑީޕީގެ ކުރީގެ ރައީސް، ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ޗެއާޕާސަންގެ މަގާމުން ފައްޔާޒު އިސްމާއިލް ރޭ އިސްތިއުފާ ދެއްވައި ދެއްކެވި ވާހަކައިގައި ވަނީ ރިޔާސީ ޕްރައިމަރީގައާއި އޭގެ ކުރިން ނަޝީދާއި ސޯލިހުގެ ދެމެދުގައި އުފެދުނު ހިޔާލު ތަފާތުވުންތަކާއި ރިޔާސީ އިންތިހާބު އަދި ރައްޔިތުންގެ މަޖިލިސް އިންތިހާބު ގެއްލެން މެދުވެރި ސަބަބުތައް ވިދާޅުވެދެއްވައިފައެވެ.
ނަޝީދު، އެމްޑީޕީގެ ކުރީގެ ގައުމީ މަޖިލިސް މެންބަރުންނަށް އަދި މިހާރުގެ ގައުމީ މަޖިލިސް މެންބަރުން ތިއްބަވާ ވަޓްސްއަޕް ގްރޫޕަކަށް މިއަދު ފޮނުއްވި މެސެޖެއްގައި ވިދާޅުވީ އެމްޑީޕީއަށް ރިޔާސީ އިންތިހާބާއި މަޖިލިސް އިންތިހާބު ގެއްލުނު ސަބަބު ސާފުކޮށްދިންކަމަށްޓަކައި ފައްޔާޒަށް ޝުކުރު އަދާކުރައްވާ ކަމަށެވެ.
”އަޅުގަނޑު ކުރިމަތިނުލައި ރައީސް ސޯލިހަށް ފުރުސަތު ދިނުމަށް ދެ ފަހަރު މަސައްކަތް ކުރިން. ރައީސް ސޯލިހުގެ ބައެއް އަރިސް ބޭފުޅުން އަދި ރައީސް ސޯލިހަށްވެސް އެގޮތް ކަމުނުގޮސް، އަޅުގަނޑުމެންނާ ނުލައި އިންތިހާބު ކާމިޔާބުވާނެކަމަށް މާ ބޮޑަށް ދެކެވި ހަރާބުވީ،“ ނަޝީދު ވިދާޅުވިއެވެ.
އެމްޑީޕީން ރޭ ބޭއްވި ގައުމީ މަޖިލީހަށް ފައްޔާޒު ހުށަހެޅުއްވި އިސްތިއުފާގެ ސިޓީގައި އޭނާ ވިދާޅުވެފައިވަނީ ޕާޓީގެ ކަންކަން ކުރިއަށް ގެންދިއުމަށް ހުރަހަކަށްވާން ބޭނުންނުވާ ކަމަށެވެ. އެހެންވެ މަގާމުން އިސްތިއުފާ ދެއްވާ ކަމަށެވެ.
ފައްޔާޒު ވިދާޅުވެފައިވަނީ ސޯލިހާއި ނަޝީދުއާ ދެމެދު އުފެދުނު ހިޔާލުތަފާތުވުންތައް ހައްލުކުރަން މަސައްކަތް ކުރައްވާފައިވާނެ ކަމަށެވެ. އެ މަސައްކަތުގެ ތެރެއިން ސޯލިހާއި ނަޝީދު ވަނީ ހިޔާލުތަފާތުވުންތަކަށް ނިމުމަށް ގެނައުމަށް މަސައްކަތް ކުރައްވާނެކަން ހާމަކުރައްވައިފައިކަމަށް ފައްޔާޒު ވިދާޅުވެފައިވެއެވެ.
”އެ ދެ ބޭފުޅުން ވާދަކުރެއްވުމުގެ ނަތީޖާއަކީ ފަހުން އަޅުގަނޑުމެން ހިތާމަކުރަން ޖެހިދާނެ ހާލަތެއް މެދުވެރިވެދާނެ ކަމަށް ގިނަ ބަޔަކަށް ގަބޫލު ކުރެވުނު ކަމެކެވެ. މިއީ ކޮންމެހެނެއް ވެސް ޕާޓީ އާއި މުޅި ގައުމުގެ ކުރިމަގަށް ވެސް އޮތް ބޮޑު ނުރައްކަލެއްގެ ގޮތުގައި އަޅުގަނޑަށް ސިފަވި،“ ފައްޔާޒު ވިދާޅުވެފައިވެއެވެ.
ރައްޔިތުންގެ މަޖިލީހުގެ އިދާރާގައި ފަސް ފަހަރެއްގެ މަތިން ނަޝީދު ފެކްޝަނުގެ ބޭފުޅުންނާއެކު ބައްދަލުކުރެއްވިކަން ފާހަގަކުރައްވައި ފައްޔާޒު ވިދާޅުވެފައިވަނީ އެ ބައްދަލުވުންތަކުގައި ވަނީ ނަޝީދު ރިޔާސީ ޕްރައިމަރީގައި ވާދަނުކުރުމާ ގުޅޭގޮތުން މަޝްވަރާކުރައްވާފައި ކަމަށެވެ.
އަދި އެ މަޝްވަރާގެ ބައްދަލުވުންތަކުގައި ވެރިކަމުގެ ނިޒާމާ ގުޅޭ ވޯޓެއް ރިޔާސީ އިންތިހާބުގެ ކުރިން ނެގުމަށާއި އެމްޑީޕީން ބަރުލަމާނީ ނިޒާމަށް ތާއީދުކުރުމާ ގުޅޭ މަޝްވަރާތަކެއް ކުރެވުނުކަން ފައްޔާޒު ވަނީ ފާހަގަކުރައްވައިފައެވެ.
ނަމަވެސް ނަޝީދުގެ ފެކްޝަނާއެކު އެއްބަސްވުމަކަށް ނާދެވުމުގެ ސަބަބުން އެ މަޝްވަރާގެ ކަންކަން ހުއްޓުމަކަށް އައިކަމަށް ފައްޔާޒު ވިދާޅުވެފައިވެއެވެ.
މަޝްވަރާތައް ކާމިޔާބު ނުވިނަމަވެސް ރައީސް ސޯލިހުގެ އެދިވަޑައިގަތުމަކަށް ނަޝީދާއެކު މަޝްވަރާތަކެއް ކުރައްވައި، އެއްބަސްވުމަކަށް އައިސްފައިވާނެ ކަމަށް ފައްޔާޒު ވިދާޅުވެފައިވެއެވެ. އެގޮތުން އެ އެއްބަސްވުމުގައި ވަނީ 2023 ވަނަ އަހަރުގެ ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރާނެ ކެންޑިޑޭޓަކު ކަނޑައެޅުމަށް ރިޔާސީ ޕްރައިމަރީއެއް ނުބާއްވައި ރައީސް ސޯލިހު ވާދަކުރެއްވުމަށް ކަނޑައެޅުމުގެ އިތުރުން ވެރިކަމުގެ ނިޒާމު ބަދަލުކުރުމާ ގުޅޭ ވޯޓެއް ރިޔާސީ އިންތިހާބުގެ ކުރިން ނެގުން ކަމަށެވެ. އެ ވޯޓުގައި އެމްޑީޕީން ވަކި ނިޒާމަކަށް ތާއީދު ނުކުރަން އެއްބަސްވި ކަމަށްވެސް ފައްޔާޒު ވިދާޅުވެފައިވެއެވެ.
އެ އެއްބަސްވުންތަކަށް އާދެވުނު ނަމަވެސް ނަޝީދާއެކު އެއްބަސްވުމުގެ ކަންކަން ކުރިއަށް ނުގެންދަން ޕާޓީގެ އިސްވެރިންނަށް ފެނިވަޑައިގެންނެވި ކަމަށް ފައްޔާޒު ވިދާޅުވިއެވެ.
ފައްޔާޒު ވިދާޅުވީ ރިޔާސީ ޕްރައިމަރީ ނިމިގެންދިޔައިރު އެމްޑީޕީގައި އޮތް އެއްބައިވަންތަކަން ވަނީ ގެއްލި ރަހުމަތްތެރިކަމުގެ މޫނު ކެނޑިފައި ކަމަށެވެ. އެކަމުގެ ނަތީޖާއެއްގެ ގޮތުން 2023 ވަނަ އަހަރުގެ ރިޔާސީ އިންތިހާބު އެމްޑީޕީއަށް ގެއްލިގެންދިޔަ ކަމަށް ފައްޔާޒު ވިދާޅުވެފައިވެއެވެ.
ރިޔާސީ އިންތިހާބު ގެއްލުމުން ދެން މަސައްކަތް ކުރެއްވީ ރައްޔިތުންގެ މަޖިލިސް އިންތިހާބު ކާމިޔާބުކުރަން ކަމަށް ފައްޔާޒު ވިދާޅުވެފައިވެއެވެ. އެގޮތުން އެހެން ސިޔާސީ ޕާޓީތަކާއެކު ކޯލިޝަނެއް ހަދަން މަސައްކަތް ކުރި ނަމަވެސް އެކަން ނާކާމިޔާބުވެފައިވާ ކަމަށް ފައްޔާޒު ވިދާޅުވެފައިވެއެވެ.
ރައީސް ޑރ. މުހައްމަދު މުއިއްޒުގެ ސަރުކާރާ ދެކޮޅަށް ފާއިތުވި ދެ އަހަރުގެ ތެރޭގައި ގިނަ މަސައްކަތްތަކެއް އެމްޑީޕީން ކުރި ނަމަވެސް ޕާޓީގެ އާންމު މެންބަރުންގެ މެދުގައި ޕާޓީއާމެދު ނުތަނަވަސްކަމެއް އުފެދިފައިވާކަން ފައްޔާޒު ފާހަގަކުރެއްވިއެވެ.
އަދި އާންމު މެންބަރުން ދަނީ ޕާޓީން ކުރަމުންދާ މަސައްކަތްތަކާ މެދު ސުވާލު އުފައްދަމުންކަމަށް ފައްޔާޒު ވިދާޅުވެފައިވެއެވެ.
