4000 ފްލެޓް ލިބުނު ފަރާތްތަކުން ދައްކަންޖެބޭ ޑައުންޕޭމަންޓް ކަނޑާލެވޭތޯ މަޝްވަރާކުރައްވާނެކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
4000 ފްލެޓް ލިބުނު މީހުންނަށް ޑައުންޕޭމަންޓްގެ ގޮތުގައި ކަނޑައަޅާފައިވާ 25،000 ރުފިޔާއެވެ. އަދި ފްލެޓްގެ ތަޅުދަނޑިތައް ދޫކުރާނީ މި ފައިސާ އެއްކޮށް ދެއްކުމުންކަމަށް މި ފްލެޓްތައް ބަލަހައްޓާ ފަހި ދިރިއުޅުން ކޯޕަރޭޝަން (އެފް.ޑީ.ސީ) ވަނީ ބުނެފައެވެ.
ރޭ ގަލޮޅޫ ރައްޔިތުންނާއި ބައްދަލުކޮށް ރައިށް މުިއއްޒު ދެއްކެވި ވާހަކަފުޅުގައި ވިދާޅުވީ 4000 ފްލެޓްގެ ޑައުންޕޭމަންޓާ ގުޅިގެން ރައްޔިތުން ފާޅުކުރެއްވި ހިޔާލުފުޅުތަކަށް ރިއާޔަތްކުރައްވައި، އެ ކަންބޮޑުވުންތަކަށް ގެނެސްދެއްވެން އޮތް އެންމެ ރަނގަޅު ހައްލު ހޯއްދަވައިދެއްވާނެކަމުގެ ޔަޤީންކަން ދެއްވާކަމަށެވެ. އެގޮތުން ޑައުންޕޭމަންޓް އެއްކޮށް ކަނޑާލާނީތީޯ ނޫނީ ބައި ބަޔަށް ބަހާލާނީތޯ މަޝްވަރާކޮށް ގޮތެއް ނިންމަވާނެކަމަށެވެ.
“ މި ދެންނެވީ މި 4000 ފްލެޓްގެ ޑައުން ޕޭމަންޓް 25،000 ރުފިޔާ، އެ އުނިކޮށްލުން ނޫނީ އެއަށް ކޮންކަހަލަ ބަދަލެއްތޯ އަދި މަހުން މަހަށް ދައްކަންޖެހޭ ވަރު، އެއަށް ކޮންކަހަލަ ބަދަލެއްތޯ ގެނެވެނީ އަޅުގަނޑުމެން ގޮއްސާ ބަލާނަން، ބަލާފައި އެކަމުގައި ގެނެވެން އޮތް އެންމެ ރަނަގަޅު ހައްލެއް އަޅުގަނޑު ގެނެސްދޭނަށް.“ ރައީސް މުއިއްޒު ވިދާޅުވިއެވެ.
4000 ފްލެޓް ލިބުނު އެންމެ އެތަނަށް މިމަސް ނިމުމުގެ ކުރިން ވައްދާނެކަމަށް ރޭވެސް ރައީސް މުއިއްޒު ވަނީ ވިދާޅުވެފައެވެ. އަދި އެތަންތަން ލިބުނު މީހުންނަށް އަންނަ ހަފްތާގެ ތެރޭގައި ތަޅުދަނޑިތައް ހަވާލުކޮށް ނިންމާނެކަމަށްވެސް ރައީސް މުއިއްޒު ވިދާޅުވިއެވެ.
