އެންމެ ފަހު ލޭ ތިއްކާ ޖެހެންދެން ވެސް ދުޝްމަނުންގެ ހަމަލާތައް ދިފާއުކުރާނެ ކަމަށް އީރާނުގެ ދިފާއީ ވަޒީރު އަޒީޒް ނާސިރުޒާދާ ވިދާޅުވެއްޖެއެވެ.
ބްރިގޭޑިއާ ޖެނެރަލް މިހެން ވިދާޅުވެފައި ވަނީ، އީރާނުގައި ހިނގަމުންދާ ސަރުކާރާއި ދެކޮޅު މުޒާހަރާތަކުގައި މިހުން މަރަމުންދާ ކަަމަށް ބުނެ، ހަމަލާދޭނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދިނުމާއި ގުޅިގެންނެވެ.
ނާސިރުޒާދާ ވިދާޅުވީ، އީރާނަށް ހަމަލާ ދޭ ކޮންމެ ދުޝްމަނުންނަށް ވެސް ”ސަޕްރައިޒްތަކެއް“ ކުރިމަތިވާނެ ކަމަށެވެ.
”މި އިންޒާރުތައް ދީފި ނަމަ، އެންމެ ފަހު ލޭ ތިއްކާ ޖެހެންދެންވެސް ގައުމު ދިފާއު ކުރާނަން، އަދި އަޅުގަނޑުމެންގެ ދިފާއީ ނިޒާމަކީ އެ މީހުންނަށް ވަރަށް އުނދަގޫ ކަމަކަށް ވާނެ،“. ނާސިރުޒާދާ ވިދާޅުވިއެވެ.
އަދި އީރާނަށް ހަމަލާ ދިނުމުގައި އެހީތެރިވާ ގައުމުތަކަކީ ޓާގެޓަކަށް ވާނެ ކަމުގެ އިންޒާރު ވެސް އޭނާ ދެއްވިއެވެ.
މިދިޔަ ޖޫން މަހު އިސްރާއީލުން އީރާނާ ދެކޮޅަށް ކުރި 12 ދުވަހުގެ ހަނގުރާމައިގެ ސަބަބުން ލިބުނު ގެއްލުންތައް މަރާމާތުކޮށް، އަސްކަރީ އުފެއްދުންތެރިކަން އިތުރު ކޮށްފައިވާ ކަމަށްވެސް ނާސިރުޒާދާ ވިދާޅުވިއެވެ.
