ހަކުރު ދަށް ކުރާ ބޭހަކީ ބަރުދަން ލުއިކުރާ ބޭހެއް ކަމަށާއި ހަމުގެ މައްސަލަތަކުގައި ބޭނުންކުރާ ބޭހަކީ ހަންގަނޑު އަލިކުރާ ބޭހެއްކަމަށް ބައެއް އޮންލައިން ޕޭޖުތަކުން އިސްތިހާރުކޮށް ވިއްކަމުންދާކަން ފާހަގަކުރެވިފައިވާ ކަމަށް މޯލްޑިވްސް ފުޑް އެންޑް ޑްރަގު އޮތޯރިޓީ (އެމްއެފްޑީއޭ) އިން ބުނެފިއެވެ.
އެމްއެފްޑީއޭ ބުނީ އެ އޮތޯރިޓީން ނަގަންޖެހޭ ހުއްދަ ނުނަގާ ބޭސް އިމްޕޯޓްކޮށް ވިއްކާ އަދި އިޝްތިހާރުކުރާ ފަރާތްތަކާއި މެދު ފިޔަވަޅު އަޅާނެކަމަށެވެ. އަދި ވިޔަފާރީގެ ގޮތުގައި ރާއްޖެއަށް ބޭސް އިމްޕޯޓްކޮށް ވިއްކޭނީ ބޭހާއިބެހޭ ގަވާއިދުގައިވާ ގޮތުގެ މަތިން އެ އޮތޯރިޓީގައި ބޭސް އިމްޕޯޓްކުރާ އަދި ވިއްކާ ފަރާތެއްގެ ގޮތުގައި ރަޖިސްޓްރީކޮށް ހުއްދަ ލިބިގެން ކަމަށް ބުންޏެވެ. ހަމައެހެންމެ އިމްޕޯޓްކުރާ ހުރިހާ ބޭހަކީވެސް ގަވާއިދުގެ ދަށުން ކަނޑައަޅާފައިވާ އުސޫލުތަކާއި އެއްގޮތަށް ރަޖިސްޓްރީކޮށް ރާއްޖެއަށް އިމްޕީޯޓްކޮށް ވިއްކުމަށް އެ އޮތޯރިޓީއިން ހުއްދަ ދީފައިވާ ބޭހުގެ ލިސްޓު (އެޕްރޫވްޑް ޑްރަގު ލިސްޓު) ގައި ހިމެނިފައިވާ ބޭހަށް ވާންޖެހޭނެ ކަމަށްވެސް ބުންޏެވެ.
މިހާރަކަށް އައިސް ނަގަންޖެހޭ ހުއްދަތައް ނުނަގާ އެކި ކަންކަމަށް ބޭނުންކުރާ ބޭސް އެތެރެކޮށް ތަފާތު އޮންލައިން ޕޭޖު ތަކުގައި އިޝްތިހާރުކޮށް ވިއްކަމުންދާކަން ފާހަގަކުރެވިފައިވާކަމަށް އެމްއެފްޑީއޭއިން ބުންޏެވެ. އެގޮތުން ލޭގައި ހަކުރު ހުންނަ މިންވަރު ދަށް ކުރުމަށް ބޭނުންކުރާ ”ސެމަގްލިޓިއުޑް“ އަކީ ހަށިގަނޑުގެ ބަރުދަން ލުއިކުރާ ބޭހެއް ކަމަށާއި ހަމުގެ މައްސަލަ ތަކުގައި ބޭނުންކުރާ ”އެޒެލައިކު އެސިޑް“ އަކީ މޫނުގެ ހަންގަނޑު ރީތިކޮށް އަލިކުރާ ބޭހެއްކަމަށް ކްލެއިމްކޮށް، އޮންލައިން ޕޭޖު ތަކުގައި އިޝްތިހާރުކޮށް، ވިއްކަމުންގެންދާކަން އެ އޮތޯރިޓީ އަށް ފާހަގަކުރެވިފައިވާ ކަމަށް ބުންޏެވެ.
އެމްއެފްޑީއޭއިން ބުނީ މިފަދަ ބޭސްތަކަކީ ކޮންމެހެން ބޭނުންކުރަންޖެހޭ ހާލަތުގައި އެކަމެއްގެ ހާއްސަ ޑޮކްޓަރެއް ލިޔެދިނުމުން ނޫނީ ބޭނުން ކޮށްގެން ނުވާނެ ބޭސްތައް ކަމަށެވެ. އަދި ފާމަސީތަކުންވެސް މިފަދަ ބޭސްތައް ދޫކުރެވޭނީ ޑޮކްޓަރު ލިޔެދީފައިވާ ބޭސް ސިޓީއަށް ކަމަށް އެ އޮތޯރިޓީއިން ބުނެފައިވެއެވެ. ހަމައެހެންމެ ޑޮކްޓަރުގެ ލަފަޔާ އިރުޝާދާއި ނުލާ މިފަދަ ބޭސް ބޭނުން ކުރުމުން ހީވެސް ނުކުރާފަދަ ހިތާމަވެރި ހާލަތެއް މެދުވެރިވެދާނެ ކަމަށް އެމްއެފްޑީއޭއިން ބުންޏެވެ.
އެމްއެފްޑީއޭއިން ނަގަންޖެހޭ ހުއްދަ ނުނަގާ މިފަދަ ބޭސް އިމްޕޯޓްކޮށް އިޝްތިހާރުކޮށް ވިއްކާނަމަ އެ ފަރާތަކާއި މެދު ފިޔަވަޅު އަޅާނެ ކަމަށް އެ އޮތޯރިޓީން ބުނެފައިވެއެވެ.
