އެމެރިކާ އާއި އިސްރާއީލުން ހުއްޓުމެއް ނެތި ހަމަލާތައް ދޭނަމަ މެދުއިރުމަތީގެ ހުރިހާ އިގްތިސާދީ ހަބްތަކަށް ހަމަލާ ދޭނެ ކަމަށް އީރާނުން އިންޒާރު ދީފިއެެވެ.
އެމެރިކާ އާއި އިސްރާއިލުން އީރާނަށް ހަަމަލާތައް ދޭން ފެށީ މިދިޔަ ހޮނިހިރު ދުވަހުގެ ހެނދުނުން ފެށިގެންނެވެ. މި ހަމަލާތަކުގެ ބަދަލު ހިފުމުގެ ގޮތުން އީރާނުންވެސް ދަނީ އިސްރާއިލާއި، މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށް ވެސް ހަަމަލާތައް ދެމުންނެވެ. އަދި މުޅި އެ ސަރަހައްދުގައި މިހާރު ވަނީ ބޮޑު ހަނގުރާމައެއް ފެށިދާނެ ކަމުގެ ބިރު އުފެދިފައެވެ.
ކުވައިތު، ބަހްރޭން، އެކުވެރި އަރަބި އިމާރާތް (ޔޫއޭއީ)ގެ އަބޫ ދާބީ އަދި ސައުދި އަރަބިއްޔާގެ ރިއާދުގައި ވަނީ ހަމަލާގެ އަޑުތައް އިވިފައެވެ.
އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސްގެ ޖެނެރަލްއެއް ކަަމަށްވާ އިބްރާހިމް ޖައްބާރީ ވިދާޅުވީ، އެމެރިކާ އާއި އިސްރާއީލުން އީރާނަށް ހުއްޓުމެއް ނެތި ހަމަލާދޭނަމަ، ބަދަލުގައި މެދުއިރުމަތީގެ އިގްތިސާދީ މަރުކަޒުތަކަށް ހަމަލާދޭން އީރާނުން މަސައްކަތް ކުރާނެ ކަމަށެވެ.
”އަޅުގަނޑުމެން ދުޝްމަނުންނަށް މި އަންގަނީ، އަޅުގަނޑުމެންގެ މައި މަރުކަޒުތަކަށް ހަމަލާ ދޭން ނިންމައިފި ނަމަ، އެ ސަރަހައްދުގެ ހުރިހާ އިގްތިސާދީ މަރުކަޒުތަކަށް ހަމަލާ ދޭނަމޭ،“. އޭނާ ވިދާޅުވިއެވެ.
”އަޅުގަނޑުމެން މިހާރު ވަނީ ހޮރްމޫޒް ކަނޑުއޮޅި ބަންދުކޮށްފައި. މިހާރު ތެލުގެ އަގު 80 ޑޮލަރަށް ވުރެ މައްޗަށް އަރާއިރު، ވަރަށް އަވަހަށް 200 ޑޮލަރަށް އަރާނެ،“ 2024 ވަނަ އަހަރުގެ ޖުލައި މަހުގެ ފަހުން ފުރަތަމަ ފަހަރަށް ބްރެންޓް ކްރޫޑްގެ އަގު 85 ޑޮލަރަށް ވުރެ މައްޗަށް އެރިކަން ފާހަގަކުރައްވަމުން އޭނާ ވިދާޅުވިއެވެ.
