ދިވެހިރާއްޖޭގައި ފިރިހެނުންނަށް އަމިއްލަ ފައިސާގެ މިނިވަންކަން އޮންނަ މިންވަރަށް އަންހެންނުންނަށް ލިބިފައި ނުވާކަމަށް ރައްޔިތުން މަޖިލިހުގެ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެއެވެ.
މަޖިލީހުގައި އަންހެނުންގެ ދައުރު ކުޑަވަމުން ދާތީ، އެކަމަށް ރޮޒެއިނާ ވަނީ ގަރާރެއް ވެސް ހުށަހަޅުއްވާފަ އެވެ. އެއީ މަޖިލީހުގެ ވަކި އިންސައްތައެއް އަންހެނުންނަށް ހާއްސަކޮށް، އިންތިހާބު ބޭއްވުމަށެވެ. ރޮޒެެއިނާ ގެންދަވަނީ ތަކުރާރުކޮށް، އެ ހުށަހެޅުމުގެ މަސައްކަތް ވީހާވެސް އަވަހަށް ނިންމައިދޭން އެދެމުންނެވެ.
މިއަދުގެ މަޖިލިސް ޖަލްސާގައި ރޮޒެއިނާ ވިދާޅުވީ އަންހެނުންގެ ހިއްސާ ކަށަވަރު ކުރުމަށާއި، ރައްޔިތުންގެ މަސްލަހަތާއި ގައުމީ މަސްލަހަތު ހިމާޔަތް ކުރުމުގައި އަންހެނުންގެ ދައުރު އިތުރުކޮށް ގައުމުގެ މުހިންމު ނިންމުންތަކުގައި ބަސް ހިމަނަން ޖެހޭ ކަމަށެވެ. އަންހެނުންނަށް ފުރުސަތުތައް ލިބެން ޖެހޭކަމުގެ މިސާލެއްގެ ގޮތުގައި ރޮޒެއިނާ ވިދާޅުވީ 1000 ފިރިހެނުންގެ ތެރެއިން އެމީހުންނާ އެއްވަރަށް ފައިސާ ލިބޭ ހުންނާނީ އެންމެ އަންހެނެއްކަމަށެވެ. އަދި ގިނަ ފަހަރަށް އަމިއްލައަށް ވުރެން ބޮޑަށް އެހެން ބޭފުޅުންގެ އެހީތެރި ކަމާއެކީގައި މިކަންކަން ކޮށްފައި އޮންނާނެކަމަށް ވިދާޅުވިއެވެ.
ރޮޒައިނާ ވިދާޅުވީ މަޖިލީހަށް ކުރިމަތިލުމުގެ ފުރުސަތު އަންހެނުންނަށް އޮތް ނަމަވެސް، އެފަދަ މަގާމަކަށް ކުރިމަތިލާ ފިރިހެނަކަށްވުރެން އަންހެނުންނަށް ގޮންޖެހުންތަށް ގިނަ ކަމަށެވެ.
މީގެ އިތުރުން އިންތިޚާބުތަކުގައި ބައިވެރި ވުމުގެ ފުރުސަތު އަންހެނުންނަށް އޮތް ނަމަވެސް ހަމަހަމަކަން ގާއިމު ނުކުރެވޭ ކަމަށާއި އަދި އަންނަ ދައުރަށް މަޖިލީހުގެ 93 ދާއިރާގެ ތެރެއިން އެންމެ ތިން އަންހެނުންނަށް އިންތިހާބު ކާމިޔާބު ކުރެވުން އެއީ ހަމަހަމަކަން ނޫންކަމަށް ވިދާޅުވި އެވެ. އަދި ސިޔާސީ ޕާޓީތަކުގައި ވެސް އިސް ސަފުން އަންހެނުން ފެންނަ މިންވަރު މަދުކަމާއި ސިޔާސީ ދާއިރާގައި އުޅޭ އަންހެނުންނަށް މީސްމީޑިއާގައި ކުރާ ފުރައްސާރަ އިންތިހާއަށް ގިނަ ކަމަށް ވަނީ ފާހަގަ ކޮށްފައެވެ.
މިހާރު ޝޯޝަލް މީޑިއާގައި ތަންތާގައި އަންހެނުންނަށް މި ފުރައްސާރަކުރާ ވަރު.. ހާއްސަކޮށް ސިޔާސީ ދާއިރާގައި މަސައްކަތް ކުރާ އަންހެނުންނަށް މި ފުރައްސާރަކުރާ ފުރައްސާރަކުރުމަކީ އެހާމެ ބޮޑު ގޮންޖެހުމެއް… އެހެން ކަމުން ރޭސް ފަށާއިރުވެސް އަންހެނުން މި ތިބެނީ މާ ފަހަތުގައި…އެހެންވީމައި އަންހެނުން އިތުރު ކުރާވަރު މި ދައްކަނީ އަޅުގަނޑުމެން މިތަނުގައި އަންހެނުން ތަކެއް އަދި މިދައްކަނީ އަންހެނުންނަށް ވީތީ ބައިތިއްބާކަޝެއް ނޫން.. އަޅުަނޑުމެން އެ ވާހަކަ މި ދައްކަނީ އަންހެނުން ތިބުމަކީ ހަމަހަމަކަމާއި އެކީގައި މަޖިލިހުގައި ތިބުމަކީ މުޅި ގައުމަށް ވެސް އޭގެ ފައިދާ އަދި މުޅި މުޖްތައުއަށްވެސް އޭގެ ފައިދާ ކުރާނެ ކަމަކަށް ވާތީ
ރޮޒެއިނާ ވިދާޅުވި ގޮތުގައި އަންހެނުންނަށް ފުރުސަތު ހޯދައިދޭ ވާހަކަ ދައްކަވަނީ މަޖިލީހުގައި ފިރިހެނުންނާއި އެއްވަރަށް އަންހެނުން ތިބުމަކީ މުޅި ގައުމަށްވެސް ފައިދާ ވާނެ ކަމަކަށްވާތީ ކަމަށާއި އަދި ދެޖިންސު އެއްވަރަށް ތިބެގެން މަސައްކަތް ކުރާ ނަމަ، މޮޅެތި ބިނާކުރަނިވި ޚިޔާލުތައް އަންނަކަން ދިރާސާ ތަކުން ދައްކާ ކަމަށެވެ. މި ސަބަބުތަކާއި ހުރެ 30 އިންސައްތަ އަންހެނުން މަޖިލިހަށް ކަނޑައަޅަން ޖެހޭ ކަމަށްވަނީ ވިދާޅުވެފައެވެ.
މީގެ އިތުރުން، މިއީ ރައްޔިތުންނަށް މަޖިލީސް ފުރިހަމަ ކުރުމަށް ލިބިދޭ އިތުރު ފުރުސަތެއްކަމަށާއި، ގައުމުގެ އުފެއްދުންތެރިކަން ކުރިއެރުވުމަށް ލިބިދޭ ފުރުސަތެއްކަމާއި އަދި ގައުމުގެ އިޖްތިމާއި މައްސަލަތަށް ހައްލުކުރުމަށް އެޅޭނެ މުހިންމު ފިޔަވަޅެއް ކަމަށް ރޮޒެއިނާ ވަނީ ވިދާޅުވެފައެވެ. އަދި އަންހެނުންނާއި ކުޑަކުދިންގެ މައްސަލަތަށް ހައްލުކުރުމަށް ހުޅުވާލެވޭ މުހިންމު ދޮރެއް ކަމަށްވެސް ވަނީ ފާހަގަކޮށްފައެވެ.
