ސްޓެލްކޯއިން އިއާދަކުރަނިވި ހަކަތަ އުފެއްދުމުގެ މަޝްރޫގައި ބައިވެރިވުމަށް ޝައުގުވެރިވާ ފަރާތްތަކަށް ފުރުސަތު ހުޅުވާލައިފި އެވެ.
ރާއްޖޭގައި ހަކަތައިގެ އިންފްރާސްޓްރަކްޗާ ކުރިއެރުވުމަށް ސްޓެލްކޯއިން މަސައްކަތްކުރަމުން އަންނަ އިރު ސްޓެލްކޯއިން މިވަނީ އިއާދަކުރަނިވި ހަކަތައިގެ މަޝްރޫއަށް ޝަރުތު ހަމަވާ ފަރާތްތަކުން ޝައުޤުވެރިކަން ފާޅުކޮށް ބައިވެރިވުމުގެ ފުރުސަތު ހުޅުވާލާފަ އެވެ.
ސްޓެލްކޯއިން އިިއުލާން ކޮށްފައިވާ އިއާދަކުރަނިވި ހަކަތަ މަޝްރޫގެ މަސައްކަތުގެ ދާއިރާތައް:
ސޯލާ ޕީވީ ސިސްޓަމްތައް ގާއިމްކުރުން:
މީގެ ތެރޭގައި ސްޓްރަކްޗާތަކާއެކު ގްރައުންޑް މައުންޓް ސިސްޓަމްތަކާއި، ފުރާޅު މައުންޓް ސިސްޓަމްތަކާއި، ސްޓްރަކްޗާތަކާއެކު ޝެލޯ ލޭގޫން އިންސްޓޯލޭޝަންތަކާއި، ފްލޯޓިން ސްޓްރަކްޗަރތަކާއެކު އޮފްޝޯ އިންސްޓޯލޭޝަންތައް ފަދަ އެކި ބާވަތުގެ އިންސްޓޯލޭޝަންތައް ހިމެނޭނެކަމަށް ސްޓެލްކޯއިން ބުނެއެވެ. އެގޮތުން ޝައުގުވެރިވާ ފަރާތްތަކުން އުފައްދާ ކަރަންޓް ސްޓެލްކޯއަށް ޕަވާ ޕާޗޭސް އެގްރީމަންޓް (ޕީޕީއޭ) ގެ ދަށުން ވިއްކުމަށް ނުވަތަ ކޮންޓްރެކްޓާ ފައިނޭންސް މޮޑެލް މެދުވެރިކޮށް ސިސްޓަމްތައް ފައިނޭންސްކޮށް އިންސްޓޯލް ކުރުމަށް ހުށަހެޅިދާނެކަމަށް ސްޓެލްކޯއިން ބުނެ އެވެ.
ބެޓެރީ އެނާޖީ ސްޓޯރޭޖް ސިސްޓަމްސް އަދި އެނާޖީ މެނޭޖްމަންޓް ސިސްޓަމްސް:
އިއާދަކުރަނިވި ހަކަތަ އުފައްދާ ވަސީލަތްތައް އިތުރުވަމުންދާ ގޮތަށް އެހީތެރިވުމަށްޓަކައި، ސްޓެލްކޯގެ ކަރަންޓް ނެޓްވޯކްތައް ހަމައަކަށް އެޅުވައި، ހަކަތަ ބޭނުންކުރުން އެންމެ ރަނގަޅުވާނެ އެޑްވާންސްސް ބެޓެރީ އެނާޖީ ސްޓޯރޭޖް ސިސްޓަމްސް (ބީއީއެސްއެސް) އަދި އެނާޖީ މެނޭޖްމަންޓް ސިސްޓަމްސް (އީއެމްއެސް) ސަޕްލައިކޮށް އިންސްޓޯލް ކުރުމުގެ ގާބިލްކަން ހުރި ފަރާތްތައް ހޯދަމުންދާކަމަށް ސްޓެލްކޯއިން ބުނެ އެވެ.
ޕަވާހައުސްތަކާއި ނެޓްވޯކްތައް ހެދުން:
ރަށްރަށުގައި ޕަވާހައުސްތަކާއި އެއާ ގުޅުންހުރި ކަރަންޓް ނެޓްވޯކްތައް ހެދުމާއި އަޕްގްރޭޑްކުރުމަށް ޝައުގުވެރިވާ އަށް ދައުވަތު އަރުވައި، ޕަވާ ހައިސްތަކާއި ނެޓްވޯކްތަކުގެ ކެޕޭސިޓީ އިތުރުކުރާނެ ފަރާތެއް ބޭނުންވާކަމަށް ސްޓެލްކޯއިން ބުނެ އެވެ.
ސަބްސްޓޭޝަންތައް ކޭބަލިން އާއި ކޮންސްޓްރަކްޝަން ހިމެނޭ ގޮތަށް 132 ކިލޯވޮޓްގެ ގްރިޑް އިންފްރާސްޓްރަކްޗާ އިތުރުކުރުން:
މި މަޝްރޫއުގައި ހިމެނެނީ 132 ކިލޯވޮޓްގެ ގްރިޑް އިންފްރާސްޓްރަކްޗާ، ފުޅާކުރުމާއި، ސްޓެލްކޯ ނެޓްވޯކްގެ ހަކަތައަށް ބޭނުންވާ މިންވަރު އިތުރުކުރުމަށް ކޭބަލް އެޅުމާއި ސަބްސްޓޭޝަންތައް ހެދުންކަމުގައި ސްޓެލްކޯއިން މައުލޫމާތުދެ އެވެ.
ސްޓެލްކޯއިން ބުނީ އެ މަޝްރޫއަށް ޝައުޤުވެރިވާ ފަރާތްތަކުން 1 މަސައްކަަތަށް ވުރެ ގިނަ މަސައްކަތުގައި ޝައުގުވެރިކަން ފާޅުކުރެވޭނެކަމަށެވެ. އެގޮތުން ޕްރޮޕޯސަލްތަކުގައި ވަކި ވައްތަރެއްގެ ސޯލާ ޕީވީ އިންސްޓޯލްމަންޓަކަށް، ބެޓެރީ އެނާޖީ ސްޓޯރޭޖް ސިސްޓަމަކަށް ނުވަތަ ގްރިޑް އިންފްރާސްޓްރަކްޗަރަށް ފޯކަސް ކުރެވޭއިރު، ސޯލާ ޕީވީ އިންސްޓޯލްމަންޓްތަކަށް ޕީޕީއޭ ނުވަތަ ކޮންޓްރެކްޓާ ފައިނޭންސް މޮޑެލް ހިމެނިދާނެކަމަށް ސްޓެލްކޯއިން ބުނެ އެވެ.
ޝައުގުވެރިވާ ފަރާތްތައް އިވަލުއޭޓް ކުރާނެ 4 މަރުހަލާއެއް އޮންނާނެކަމަށް ސްޓެލްކޯއިން ބުނެ އެވެ. އެގޮތުން ސްޓެލްކޯގެ ގަވައިދުތަކުގެ މަތިން މުރާޖާ ކުރުމަށް ކޮންސެޕްޓް ޕްރޮޕޯސަލް ހުށަހެޅުމާއި، ޝައުޤުވެރިވާ ފަރާތްތައް ހުށަހެޅުމަށް ކަނޑައަޅާފައިވާ ޝަރުތުތަކަށް ހަމަވޭތޯ ބަލައި، ބޭނުންވާ ހުރިހާ ލިޔެކިޔުންތަށް ފޯރުކޮށްދީފައިވާކަން ކަށަވަރުކުރެވިގެންދާނެކަމަށް ސްޓެލްކޯއިން ބުނެ އެވެ. އަދި ޝައުގުވެރިވާ ފަރާތްތަކުން ސްޓެލްކޯގެ ލަނޑުދަނޑިތަކާއި، ޓެކްނިކަލް ފީސިބިލިޓީއާއި، ޖުމްލަކޮށް ކުރިމަތިވެދާނެ މައްސަަލަތަކާ އެއްގޮތްވާ މިންވަރު ވަޒަންކުރުމަށް ސްޓްރެޓެޖިކް އެސެސްމަންޓެއް ހަދާނެކަމަށް ސްޓެލްކޯއިން ބުނެ އެވެ. އަދި އެންމެ ފަހު މަރުހަލާއެއްގެ ގޮތުން ތަފްސީލީ ޕްރޮޕޯސަލް ހުށަހެޅުމާއި، ނެގޯޝިއޭޝަން އަދި ފައިނަލް ބިޑިން އޮފާ ހުށަހެޅުމާއި އަދި އެގްރީމަންޓް ތަންފީޒުކުރެވިގެންދާނެ އެވެ.
ޝައުގުވެރިވާ ފަރާތްކުން ހުރިހާ ލިޔެކިޔުމަކާއި އެއްކޮށް ހުށަހަޅަން ޖެހެނީ ޑިސެމްބަރު 30 ގެ ނިޔަލށްކަމަށް ސްޓެލްކޯއިން ބުނެ އެވެ.
