ބ. އޭދަފުށީގައި 1000 ފްލެޓް އެޅުމަށް ޗައިނާގެ ކުންފުންޏަކާ މިއަދު ހަވާލުކޮށްފި އެވެ.
އެ މަޝްރޫއުގެ ދަށުން 15 ބުރީގެ 12 ޓަވަރުގައި ތިން ކޮޓަރި އާއި ދެ ކޮޓަރީގެ އެޕާޓްމަންޓްތައް އަޅާނެ އެވެ.
މީގެ ކުޑައިރުކޮޅެއް ކުރިން ރައީސް އޮފީހުގައި ބޭއްވި ރަސްމިއްޔާތެއްގައި އެ މަޝްރޫއު ހަވާލުކުރީ ޗައިނާގެ ސީނޯ ހައިޑްރޯ ކުންފުންޏާ އެވެ.
އެ މަޝްރޫއުގެ އެއްބަސްވުމުގައި ސޮއި ކުރެއްވުމަށްފަހު ވާހަކަ ދައްކަވަމުން ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު ވިދާޅުވީ އޭދަފުށީގައި 15 ބުރީގެ 12 ޓަވަރު އެޅުމަށް ކަނޑައަޅާފައިވާ މައިގަނޑު ސަބަބަކީ އެ ރަށަކީ މި ސަރުކާރުން އާބަން ސެންޓަރެއްގެ ގޮތުގައި ތަރައްގީ ކުރާ ރަށެއްކަމުން، ބިމުގެ ބޭނުން އެންމެ ހެޔޮ ގޮތުގައި ހިފުމަށް ވާޓިކަލް ޑިވެލޮޕްމަންޓެއް މުހިންމުވާތީ ކަމަށެވެ.
އޭދަފުށީގައި އަޅާ ފްލެޓްތަކުގެ ތަފްސީލު:
– ތިން ކޮޓަރީގެ 336 ފްލެޓް
– ދެ ކޮޓަރީގެ 672 ފްލެޓް
މުއްތަލިބު ވިދާޅުވީ އެ ރަށަކީ ބ. އަތޮޅުން އާބާދީ އާއި ތަރައްގީ އެއް ފަސްކުރުމުގެ ނާރެހެއް ކަމަށެވެ.
މިނިސްޓަރު ވިދާޅުވި ގޮތުގައި ރައީސް ޑރ. މުހައްމަދު މުއިއްޒު ވައުދުވެވަޑައިގެންފައިވާ ގޮތަށް ޓޫރިޒަމް ދާއިރާގައި މަސައްކަތްކުރާ ފަރާތްތަކަށް އެ މީހުން ދިރިއުޅޭ ސަރަހައްދުން ބޯހިޔާވަހިކަން ފޯރުކޮށްދިނުމުގެ ފުރުސަތު ދިނުމަށް އޭދަފުއްޓަކީ ރަނގަޅު ރަށެކެވެ. އެ ރަށުގެ ވަށައިގެން ގިނަ އަދަދެއްގެ ރިސޯޓުތައް އޮންނަ ކަމަށް މިނިސްޓަރު ވިދާޅުވި އެވެ.
އޭނާ ވިދާޅުވި ގޮތުގައި ތައުލީމީ ދާއިރާ އާއި ސިއްހީ ދާއިރާގެ އިތުރުން ދަތުރުފަތުރުގެ ދާއިރާއަށް ބެލިޔަސް އޭދަފުއްޓަކީ ބޯހިޔާވަހިކަމުގެ ބޮޑު މަޝްރޫއެއް ހިންގަން ރަނގަޅު ރަށެކެވެ.
”އޭދަފުށީ ވަށައިގެން ވަރަށް ގިނަ ރިސޯޓުތައް އެބަ އޮތް. ވަރަށް ގިނަ އަދަދެއްގެ ދިވެހިން މަސައްކަތް ކުރަމުން ގެންދޭ. އޭދަފުއްޓަކީ މަތީ ތައުލީމުގެ ވަރަށް ރަނގަޅަށް އިންސްޓިޓިއުޝަންތަކެއް ގާއިމުވެފައި އޮތް ރަށެއް. ސިއްހީ ހިދުމަތް އެކަށީގެންވާ ވަރަށް ދެމުންދާ ރަށެއް. އޭދަފުއްޓަކީ ކަނޑުމަގުންނާއި ވައިގެ މަގުން މާލެއަށް ދަތުރުކުރުމަށް ފަސޭހަކަން ލިބިގެންވާ ރަށެއް،“ މުއްތަލިބު ވިދާޅުވި އެވެ.
އެހެންވެ، އެ މަޝްރޫއުއަކީ ސަރުކާރުގެ ބޯހިޔާވަހިކަމުގެ މަޝްރޫއު ފަށައިގަތުމަށް މުހިންމު މަސައްކަތެއް ކަމަށް ވިދާޅުވި އެވެ.
މުއްތަލިބު ވިދާޅުވީ އަންނަ އަހަރު އެ މަޝްރޫއުއަށް ފައިނޭންސް ހަމަޖެހި، މަސައްކަތް ފެށޭނެ ކަމަށް އުއްމީދު ކުރައްވާ ކަމަށެވެ. އަދި މި ދައުރު ނިމުމުގެ ކުރިން އެތަނުގައި މީހުންނަށް ދިރިއުޅެވޭނެ ކަމުގެ ޔަގީންކަން އެބަ އޮތް ކަމަށް ވިދާޅުވި އެވެ.
