އިންސާނުންގެ ތެރޭގައި އެތައް ބާވަތެއްގެ މީހުން އުޅެއެވެ. އެކި މީހުންގެ އެކި ސިފަތައް ހުރެއެވެ. އެހެނަސް މިއަދު އަޅުގަނޑުމެންގެ މުޖުތަމަޢުގައި ވަރަށް ނުރައްކާތެރި ބަޔަކު އުޅެއެވެ. އެއީ ދެދުވަހު އެއްވާހަކައެއް ނުދައްކާ، ސިފަ ބަދަލުކޮށް، ކުލަ ބަދަލުކޮށް މުނާފިގުންގެ ގޮތްގަނޑަށް އުޅޭ މީހުންނެވެ. މިފަދަ މީހުންގެ ސަބަބުން މުޖުތަމަޢުގެ ސުލްޙަމަސަލަސްކަމަށް ބޮޑެތި ގެއްލުންތަކެއް ލިބެމުންދެއެވެ.
ޚާއްޞަކޮށް ތަންދޮރު ދަންނަ ބޮޑެތި މީހުންގެ ތެރެއިން މިފަދަ ޢަމަލުތައް ފެންނަމުންދާކަމީ ހިތާމަހުރި ކަމެކެވެ. މުޖުތަމަޢުގެ ނަމޫނާއަކަށް ވާންޖެހޭ މީހުން މިފަދަ ޢަމަލުތައް ކުރުމަކީ ޒުވާނުންނަށް ދެވޭ ނުބައި މިސާލެކެވެ. ބަދަލު ނުވެ އޮންނަ ކަމެއްގައި އެއްދުވަހު އެއްގޮތަކަށް ވާހަކަދައްކާ، އަނެއް ދުވަހު އެހެން ގޮތަކަށް ވާހަކަދެއްކުމަކީ އިސްލާމްދީނުގައި ވެސް ހުއްދަކުރާ ކަމެއް ނޫނެވެ.
މިފަދަ މީހުންގެ ސަބަބުން މުޖުތަމަޢުގައި އިތުބާރު ގެއްލި، ފިތުނަފަސާދަ އިތުރުވެގެންދެއެވެ. އެއްބަޔަކު އަނެއްބަޔަކަށް ޝައްކުކުރަން ފަށައެވެ. މީގެ ސަބަބުން މުޖުތަމަޢުގެ އެއްބައިވަންތަކަން ގެއްލި، ބައިބައިވުން އިތުރުވެގެންދެއެވެ.
އަޅުގަނޑުމެން އެންމެން ވެސް ވިސްނަންޖެހޭނީ ތެދުވެރިކަމާއެކު، އިޚްލާޞްތެރިކަމާއެކު ދިރިއުޅެން ދަސްކުރާށެވެ. އަމިއްލަ ނަފްސަށް ވެސް، އެހެން މީހުންނަށް ވެސް އޮޅުވާލެސް އޮޅުވާލުމަކީ ރަނގަޅު ކަމެއް ނޫނެވެ. އަޅުގަނޑުމެންގެ ކިބައިގައި ހުންނަންވާނީ ސާބިތުކަމާއި، ތެދުވެރިކަމާއި، އަމާނާތްތެރިކަމެވެ.
މިފަދަ ނޭދެވޭ ސިފަތަކުން އެއްކިބާވެ، އިސްލާމްދީނުގެ މަތިވެރި އަޚްލާޤުތަކުގައި ހިފަހައްޓައިގެން ދިރިއުޅުމަކީ ކޮންމެ މުސްލިމެއްގެ ވެސް ވާޖިބެކެވެ. އަޅުގަނޑުމެން އެންމެން ވެސް މަސައްކަތް ކުރަންވާނީ ރަނގަޅު ނަމޫނާއަކަށް ވުމަށެވެ. އޭރުން އަޅުގަނޑުމެންގެ މުޖުތަމަޢު ވާނީ މާ ހެޔޮ، މާ ރަނގަޅު ތަނަކަށެވެ. މުނާފިގު ޒާތަކަށް އުޅެން ފެށުމުން މީހުންވެސް ކުރާނީ މަލާމާތެވެ! އަމައްޔާތް! މީނަވެސް ދެން އުޅޭ ފާޑު ދޯ!
